用鉛筆畫記錄城市老樹，樹藝師：我畫得慢，樹卻消失得快——樹藝師
每逢午膳便是新哥的午間速寫時間，五十來歲、從事平面設計行業的他會速速享用蕃薯或麵包作輕便午餐，再在公司附近的某一隅，手執一支鉛筆一本畫簿，透過石墨筆尖與白色畫紙不斷的觸碰，逐漸勾勒出面前盡入眼簾的景致。「已經十幾年啦，我唔會話自己好鍾意畫畫，只係當初好有恆心咁一直畫落去，喺年月間成為我嘅習慣，喜好會隨歲月流逝而改變，但習慣唔會變，又或者係好難變。」他解釋道。
新哥較多人認識的一個項目，是在2007年開始的「以木畫木」，以木製鉛筆在木漿畫紙上，繪畫出一棵又一棵的樹木，一畫便是十三個寒暑，充分體現他口中的持之以恆。他為這個項目開設了FB專頁「樹藝師」，以分享他的樹木作品。「作品嘅意義係在於大樹本身嘅型態，當中我只係一個演繹者。」
城市樹木記錄者
畫樹初期，新哥筆下的作品主要為古樹名木，不時為了一棵樹前往偏遠郊區。「不過之後慢慢就開始主力畫城市中嘅樹，佢哋為大家遮蔭擋雨，陪伴大家生活同成長，更重要嘅係佢哋隨時會因為城市發展，或者係單純被人投訴阻街，轉過頭就消失咗，好多時都係鬥快畫，有時未畫完一幅畫，棵樹就已經無咗。」
筆下眾多樹木中，他尤其喜愛西環科士街的一行石牆樹，細葉榕在石牆罅隙之間絕處逢生，意志堅韌。「其中一棵型態好特別，由下向上望，就好似一個牛頭伸出嚟咁，後來因為港鐵發展西港島線而消失咗，不過似乎都無咩人留意到。」
有別於其午間速寫的畫作，樹木作品的筆觸極為細膩，由縱橫交錯、糾纏不清的樹根、陽光下濃密綠葉的光暗陰影，到每一枝節的年輪紋理，每個細節均勾勒得一絲不苟，畫得出神入化。「每次發掘到想畫嘅樹後，我都會去實地考驗一下，用心觀察一下每個細節，同埋用相機影勻曬棵樹嘅每一個角度，大大話話都有成二、三百張，番到屋企再慢慢睇番，決定用邊個角度去記錄呢一棵樹，基本上係精雕細琢出每個細節，最快要成兩個月先完成到一幅作品。」
他笑言，每次用手機給母親看自己的作品時，母親都是回他一句：「你比我睇相做咩姐？」三年前，他為了病重的母親首度舉辦個人畫展，展出了當時一共有76幅作品，一個月後母親病逝。「媽媽以前成日問我畫嚟做咩，又賣唔到錢，有咩用呢。所以我就搞咗呢場畫展，叫做比佢睇到我一直以來嘅作品。」他喃喃道來。
「樹木依舊，香港卻不再一樣」
那一場畫展，對新哥而言亦是一個反思的時間。「其實都有考慮唔畫落去架啦，保育城市中嘅樹唔係靠我一個畫家去做，而係靠政府同市民一齊努力，見住好多『老朋友』消失咗，我都會諗自己係為咩而畫。」沒想到這場畫展會為他帶來不少關注，很多人都鼓勵他繼續畫下去。「有中上環街坊認得其中一棵樹，因為就係喺佢屋企樓下，棵樹對佢嚟講充滿回憶，聽到呢啲回應最開心。」
三年後的今天，部份樹木屹立依舊，可惜物是人非，香港亦不再一樣。新哥不諱言，隨時或會停止這個項目。「早年鍾意畫樹，係因為想記錄低陪住自己成長嘅香港，但呢兩年香港發生嘅種種事情，都令我唔再留戀香港。」他感嘆道。
近日因香港的社會事件有感而發，新哥繪畫了一幅獅子山的作品。「咁啱我又買咗支長鏡，就專登去影咗成幾百張相，咩角度都有，希望全面影低獅子山嘅面貌，然後我再逐張逐張睇下從邊個角度入手畫呢張畫。」
他指出，獅子山不僅代表了香港精神，更是陪伴他成長的一個象徵。「我細細住黃大仙東頭村嘅七層大廈，一開門就會見到獅子山，之後搬去沙田，基本上出入交通經過隧道就會見到，結婚後搬去九龍城，仍然都係離不開佢！」
圖片來源：受訪者提供 @lunch_sketch
FB：樹藝師
#StartChing#StartChange#hongkong#business#startup#香港#追夢者#創業人#香港畫家#樹藝師#鉛筆畫#午間速寫#以木畫木#城市樹木記錄者#西環科士街#石牆樹#細葉榕#個人畫展
＝＝＝＝＝
【本月主題：#香港製造】
＝＝＝＝＝
StartChing 的團隊是由幾位90後媒體人組成，希望用文字和影片分享本地追夢者的故事，一同成就彼此的夢想。
Follow FB：StartChing
Follow IG @start.ching：bit.ly/2F4gRzT
訂閱YouTube Channel：bit.ly/3jPjlSv
如欲與我們分享你的故事，歡迎電郵至：[email protected]
