港女闖印度打工三年：從當地人學習到何為「永恆」——Deborah

談及印度，這個國家身上似乎懸掛著無數負面標籤，不少港人對之的印象，就是能避則避的「鬼國」。難得認識一位香港女生在當地打工三年，不時在社交媒體上分享生活照，看到她真摯的笑靨，似乎相當融入當地的文化環境，記者便即管越洋與她通上一次電話，了解一下這位港女在當地的所見所聞。

Deborah首次接觸印度文化，是源於在大學交流生活動中認識了一位印度朋友。「我鍾意同唔同國籍嘅人交流，了解唔同地方嘅文化，呢位朋友介紹咗好多印度電影我睇，分享好多當地嘅習俗故事我知，所以慢慢令我開始對呢個國家產生興趣，應承呢位朋友第時一定會去印度旅行搵佢玩！」

直至數年後，這位朋友即將移民往他國定居，她才「急忙」兌現承諾。「其實一早想去，不過嗰陣啱啱先廿歲，加上不時都有當地嘅負面新聞，爸爸媽媽堅決唔比；到大嗰啲，試過自己周圍去旅行，就先斬後奏出發先同佢哋講，哈哈。」

對於這個國家，她一直避免以先入為主的態度對待，「我從來無諗過會同印度有咩淵源，有時世事就係咁，身邊出現某人某事，接觸到從未了解嘅食物、習俗，就會突然打開咗一個新世界。所以從呢位朋友開始，我選擇用『留白』嘅態度看待呢個地方，親眼去當地用自己雙眼觀察，重塑呢個國家係我心目中嘅真實形象。」

她指出，印度的一、二線城市相當乾淨，當地人亦相對開明，「印度真係好大、好多人，大家認知中唔文明、污漕嘅印度，主要係三、四線城市嘅情況嚟。我喺大城市中接觸到唔少人都好認同男女平等，例如有個日子係當地女性要為男性禁食祈禱，有位媽媽直言唔會咁做，提出話又唔見男士願意調番轉為太太禁食。」

沒有斷捨離的印度人？

從當地人的身上，她看到他們看待人事物那份真誠與「永恆」的態度。

「雖然印度階級觀念都幾嚴重，但一旦認定咗你係朋友，就會好重視同你之間嘅關係，無論幾耐無見都好，都會間唔時關心下你點。無論係之前旅行認識，或者係呢幾年工作認識嘅朋友，好多都能夠一直維繫得到，當初我之所以會去當地工作，其實都係由旅行中認識嘅朋友介紹。」她分享道。

而更讓她深刻的是，是他們珍惜每一件物件的心。「佢哋係完全無斷捨離嘅概念，閒閒哋一件傢俬可以有上百年歷史，唔知係幾多代人傳承落嚟，就算係搬屋搬去好遠都會照搬，就算有嘢爛咗或者係款式唔啱心水，都會專登搵師傅整番或修改，講緊可能仲貴過買全新！」

一屋子的物件，背後盛裝著的是一個家族的歷史痕跡。「可能係將媽媽、婆婆嘅刺繡裱起，可能係將祖先結婚嘅服裝掛喺角落，有時已經唔記得物主係邊個，成間屋充滿唔同家族成員嘅色彩，就好似印度好多唔同類型嘅宗教建築咁，一個國家容納咗好多元化嘅色彩，呢個亦都係我幾鍾意印度嘅地方。」

未完待續。
下一集與大家分享Deborah在當地職場的所見所聞！

圖片來源：受訪者提供

#StartChing #StartChange #hongkong #business #startup #香港 #追夢者 #創業 #追夢 #初創 #夢想 #人物故事 #女生 #印度 #永恆 #文化交流 #多元宗教 #斷捨離 #珍惜
＝＝＝＝＝
【本月主題：非凡女生】
＝＝＝＝＝
StartChing 的團隊是由幾位90後媒體人組成，希望用文字和影片分享本地追夢者的故事，一同成就彼此的夢想。

Follow FB：StartChing
Follow IG @start.ching：bit.ly/2F4gRzT
訂閱YouTube Channel：bit.ly/3jPjlSv

如欲與我們分享你的故事，歡迎電郵至：[email protected]