港女大談印度職場經歷：當地人活得很真實！——Deborah
上回提及，一位香港女生Deborah在因緣際會下，前往印度打工三年至今。她當初選擇以一個「留白」的態度，親身見證當地人的真實面貌，更在年月間愛上了他們的一些特質，譬如對待朋友的真誠、對待物件的「永恆」態度等。
三年前在朋友的介紹下，Deborah在完成碩士課程過兩天便旋即飛往印度。「當刻嘅感覺係，我唔想留喺香港，覺得長久喺呢個城市生活係一件好拘束、令人窒息嘅事，亦都唔想日日著得斯斯文文，踢住對高跟鞋做OL，既然有咁嘅機會喺面前，不如就去馬啦！」她憶述當初作出這個決定時的心情。
過往三年間，Deborah先後進入過數家在當地的華人公司工作，充份體驗到文化差異在職場上的衝擊。「印度當地有好多華人公司，通常佢哋會請番華人做高層、主管，管理住一班印度員工，其實我當時先廿歲出頭，一去到就已經做主管，其實都幾大壓力。我會覺得自己何德何能，第一份全職工作已經要管理人，更加唔洗提又要適應全新環境，同埋不斷喺華人同印度人之間周旋。」
印度人衝動卻真誠
她笑言，當年剛剛入職的自己，首個任務竟然是要「炒人魷魚」。「仲記得嗰陣炒完位印度同事後，佢就即刻報警，話公司扣留佢人工，我都完全唔知發生咩事，真係嚇一跳！印度人係比較易激動，有咩就會即刻爆出嚟，試過我條Team有同事搞活動時壓力好大，可能有人講咗句刺激到佢嘅說話，竟然大打出手！」
不過她認為，印度人容易將感受表露無遺，從另一角度看反而是件好事。「佢哋往往係爆完出嚟，之後就無事，唔似得大部份香港人係工作上唔滿意，會自己吞咗啖氣就算。佢哋願意真誠表達，起碼可以直接了解到佢哋嘅諗法，然後我再睇下點去處理，好過你下下都要估啲同事諗咩，同埋只要你好冷靜咁理性分析件事，佢哋其實都好樂意聽，花咗一段時間適應後已經覺得無咩問題！」
相比其他華人同事，Deborah更願意入鄉隨俗，感受當地文化，因此贏得不少同事的尊重與親近。「我會學習融入當地文化，例如係用手食嘢，唔好以為好簡單，因為當地人係只可以用右手食，原來單手扯包好難架，又會食到成手醬。大家見到我願意咩都試下都好開心，覺得好有趣，成日都請我食嘢，有時同事屋企煲咗湯都會專登拎比我飲！」她笑笑口說。
在她離任其中一間公司時，幾位同事更即席在辦公室中為她高歌一曲。「印度人真係好鍾意唱歌跳舞，因為印度歌曲有九成都係源自電影，好多歌都係跳住舞唱，平時有時聽到播歌，都會自己走去跳舞，嗰氣氛好好笑又好開心！」
學懂追求心靈健康
三年之間，Deborah在當地學懂的，不僅是在職場上的管理技巧，亦學習到如何將人生的重心聚焦在生活之上，做到大家近年提倡的「Work Life Balance」。
「嚟到呢度後，好多人關心我時係會問我『How’s your day』，而唔係『How’s your work』，但香港就啱啱相反；就算係我同爸媽Face Time，佢哋唔會問我一句生活點樣呀，過得開唔開心呀，而係問我番工番成點，可能佢哋覺得係同一個意思，但我覺得呢個就係差別。喺香港，工作好多時就係等同生活，忽略咗好多生活嘅其他元素。」她感嘆。
她指出，印度的職業相當多元化，大家亦更願意追逐自己的理想。「有位朋友番咗Office工一段日子，同老公講話頂唔順份工，佢老公又真係叫佢唔好做；後來佢就走咗去畫牆，亦都好享受周圍畫畫呢份工作，令我深深感受到佢哋重視心靈健康多過工作。」
圖片來源：受訪者提供
#StartChing#StartChange#hongkong#business#startup#香港#追夢者#創業#追夢#初創#夢想#人物故事#女生#印度#印度職業#文化交流#文化衝擊#入鄉隨俗#心靈健康#WorkLifeBalance#India
＝＝＝＝＝
【本月主題：非凡女生】
＝＝＝＝＝
StartChing 的團隊是由幾位90後媒體人組成，希望用文字和影片分享本地追夢者的故事，一同成就彼此的夢想。
Follow FB：StartChing
Follow IG @start.ching：bit.ly/2F4gRzT
訂閱YouTube Channel：bit.ly/3jPjlSv
如欲與我們分享你的故事，歡迎電郵至：[email protected]
