90後用植物、廚餘製天然染料，秉持職人精神復興「香港藍」——藍小屋 Indigood House
日本有一種精神，叫「#職人精神」，窮一生的精力，只為做好一件事。
90後香港男生Eric，在過去數年以來秉持著香港少見的「職人精神」，孜孜不倦地在少量文獻的字裡行間中尋找線索，甚至走訪本地不同的村落，從老村民的口述回憶中窺探昔日的藍染歷史，只為將本地的藍染傳統復興。
所謂藍染，是指利用 #藍草（藍染植物的統稱）製成天然染料為布品染色的傳統工藝。「其實唔止係日本，韓國、台灣、中國嘅 #藍染文化 一直傳承至今。明明香港都曾經有人喺呢片土地種出藍染植物、有一段藍染歷史、有屬於自己嘅『#香港藍』，點解唯獨係香港無辦法將藍染文化傳承落嚟呢？」
一番疑問過後，Eric沒有感嘆一聲便置之腦後，而是選擇創立出品牌「藍小屋 Indigood House 」，用行動將本地藍染歷史延續下去。
在「藍小屋」的工作坊中，學員手執布料，以橡筋木夾彈珠等工具縛縫，再將想染色的部分置於顏料中⋯⋯愉悅的染布過程背後，是Eric與拍檔一步一腳印走出來的成果。
由零開始復興文化
「每個地方嘅藍染都有自己嘅特色，例如係日本會喺過程中加入清酒、中國會加入米酒，喺唔同土地嘅氣候影響下，最終藍染嘅成品都會有所不同，我哋想尋找番屬於香港嘅藍染『配方』，重現『香港藍』。」
多番研究下，Eric發掘到昔日村民所種植的藍草品種，並借用朋友的2千多呎農田，從種植開始生產出天然的藍色染料。
「任何人都可以一齊參與，雖然我哋花咗好多年去研究藍染『配方』，但唔會視之為秘密，甚至將培育得好辛苦、逐粒逐收番嚟嘅種子比大家，得我一個種無意思，一齊種先能夠令呢件事延續落去。」
重塑廚餘的價值
Eric早在大學時期已開始染布研究，最初是收集廚餘製作天然染料。「大學我修讀環境學，從中了解到本地廚餘嘅情況嚴重，於是就開始探索有無方法令佢嘅價值得以善用。」
一次用餐時被咖喱弄髒衣服的意外，成為Eric與拍檔開展廚餘染布事業的契機。「我哋去街市、餐廳係咁問人拎唔要嘅蔬果食物，或者係餸頭餸尾，然後用嚟試驗每一款廚餘嘅染色效果，最終喺2012年時成立公司『好樹設計Run2Tree Studio』，主要從事廚餘染色開發嘅開發工作。」
2016年時，他們更獲得社創基金 #好薈社 (Good Seed)的資助，創立主力開辦工作坊的品牌「@dyelicioushouse」，曾為基層家庭開辦課程，改善他們的親子關係，由「#廚餘再生」做到「#關係再生」。
一生做好一件事
使用化工染料，一倒一浸，再置於微波爐中微波半分鐘，看得見的是色差不大的完成品，看不見的卻是對人體、環境造成負擔的毒性與污染物。「我哋種植藍草需時幾個月，收割後要發烤一星期，染色係需要逐次染，每15分鐘一次，如果要深藍色嘅話要染成十幾次，無番3、5個鐘都搞唔掂。」
一件件由天然染料製成的布品，色澤柔和不刺眼，多了一份恬靜之感，讓人不禁細味背後盛載著的文化底蘊。「過去走訪唔同地方了解當地染布工藝時，見證好多人全身投入一件事，唔係為咗賺咩錢，可能只係為咗做好一項工藝、傳承一種文化，或者係做一件佢哋眼中美好嘅事情。香港人事事求快，下下為個錢字，令好多值得保留嘅美好價值喺年月間流走。」他感嘆道。
近十年的光景，由重塑廚餘價值，到復興本地藍染文化，Eric盼有一天，能夠看到本地工業昔日的盛世重臨。「我無辦法要求人地去做啲咩，但我可以自己行出第一步，用行動去感染其他人參與呢件事，一齊令香港成為一個更好嘅地方。」
圖片來源：受訪者提供
＝＝＝＝＝
Good Seed HK 現正進行新一輪招募，今屆亦加入很多前所未有的新元素，更可獲得高達二十萬的種子基金，開展你的社創之旅！
立即報名，成為我們的 #Changemaker！
詳情：http://goodseed.hk/
報名：https://bit.ly/3qgtLx7
截止日期：2021年2月10日 18:00
＝＝＝＝＝
#StartChing #StartChange #hongkong #homekong #business #startup #hkstartupers #dreamer #90後 #夢想 #香港 #追夢者 #創業人 #GoodSeed #prototype #社創 #社會創新 #社創基金 #綠色生活 #廚餘 #香港製造
＝＝＝＝＝
【本月主題：樂齡樂活】
＝＝＝＝＝
StartChing 的團隊是由幾位90後媒體人組成，希望用文字和影片分享本地追夢者的故事，一同成就彼此的夢想。
Follow其他社交平台： linkby.tw/StartChing
如欲與我們分享你的故事，歡迎電郵至：[email protected]
