為老友記拍片分享生命，成就兩代人彼此了解的契機——一刻紀錄 Time Rider Production
上回說到，Rita在2017年創立影片製作公司「#一刻紀錄」，專門為老友記拍攝紀錄片，透過訪談的方式，由長者親自訴說自己的生平往事；創業契機是源於日漸老邁的父母，令她希望把握每一刻，以另類方式留住「留不住」。
由打工仔膽粗粗變創業人，一手一腳經營著一門生意，Rita直言經歷了好些波折才漸漸找到方向，「當初我連Business Model（商業模式）呢個Terms都未聽過，明明呢啲係事先應該要諗清楚，相信會令成件事順利好多。不過調轉頭諗，如果當初唔係一腔熱血、盲舂舂做呢件事，凡事都計好條數先去做，就應該會繼續做個打工仔就算。」她笑笑口說。
#分享生命中的喜怒哀樂
Rita鏡頭下的拍攝對象，有的兒孫滿堂，也有的是獨居多年的老人。「最初搵機構幫手安排呢件事，我都有諗過獨居長者其實有無咁嘅需要，因為佢哋似乎都無人可以分享到。後來先發現自己睇嘢幾狹窄，獨居背後都有好多可能性，呢一條片反而比咗一個機會佢哋，將一直收埋心底入面嘅說話分享出嚟。」
從每一場訪談、拍攝中，她了解到每個人均值得擁有一個機會，將生命中的喜怒哀樂暢所欲言。「有獨居長者甚至整多幾個DVD Copy送比仔女，透過影片訴說自己嘅人生，可能係遇上咩事情，或者係有啲咩原因，令佢最後行到呢一步。」
送上一張DVD、訴說一段往事，或許又是人生中另一個重要的決定，令彼此的關係不再一樣。
#創造重新對話的機會
近年從社會環境、政治事件牽引出的世代之爭，令不少家庭的關係破裂。「我諗要追溯至2014年雨傘運動之時，因為大家經歷嘅時代、經驗都唔同，大家各持己見互不理解，無辦法放低自己去聆聽、理解對方嘅想法，好多時食飯一講政治就出事，而呢兩年又要重演番呢件事。」
在Rita的成長中，父親一直默默為生計勞碌，不擅於向家人表達愛。「聽過爸爸當年走難嚟香港、缺乏爺爺關懷下成長嘅故事後，我就明白點解佢會唔識做一個爸爸，因為爺爺都係一樣咁做爸爸，呢個係原生家庭帶嚟嘅影響。起碼我聽完佢嘅故事後，我能夠從佢立場理解佢多啲。」
一個「傻傻地」的想法便油然而生，「大家『傾唔埋欄』，會唔會透過影片可以彼此了解多啲，可以唔多唔少緩和到大家嘅關係呢？我相信拍攝紀錄片除咗係比長者分享自己故事外，同時都為呢家人創造緊新嘅回憶，創造緊一個重新對話嘅機會。」
#後記
記者在訪談當中好奇問及，既然「一刻紀錄」是始於Rita的父母，那屬於她與父母的紀錄片是否早已完成拍攝呢？
Rita感嘆說：「仲未拍呀。可能就係對住父母講唔出『我愛你』咁，一直都想等自己Ready好，等自己可以做到最好嘅時候，先為父母拍一條我心目中最完美嘅紀錄片。不過時間真係唔等人，我都希望可以及早拍到呢條片！」
願Rita、願大家都好好珍惜了解父母、與父母相處的時光！
上集回顧：
【#樂齡樂活 】讓逝者在喪禮「隔空」笑談生平？初創為長者拍片留下印記
https://www.facebook.com/112476090494747/posts/245071027235252
圖片來源： 受訪者提供 一刻紀錄 Time Rider Production
#StartChing #StartChange #hongkong #homekong #hk #hkstory #business #startup #hkstartupers #dreamer #MadeInHK #香港 #香港人 #追夢 #創業 #人物故事 #銀髮 #銀髮市場 #長者 #老友記 #紀錄片 Paragon Asia
＝＝＝＝＝
【本月主題：香港製造】
＝＝＝＝＝
StartChing 的團隊是由幾位90後媒體人組成，希望用文字和影片分享本地追夢者的故事，一同成就彼此的夢想。
Follow其他社交平台： linkby.tw/StartChing
如欲與我們分享你的故事，歡迎電郵至：[email protected]
