來自馬拉的創業靚媽：香港是我願意留守的城市——Nicole’s Kitchen Hong Kong
生於馬來西亞的Nicole，長大後往越南闖一番事業，遇上值得相守一生的人後，便隨他來港成家立室，成為一位全職太太與媽媽，親力親為照顧家人與一對寶貝兒子；十年前，因為心中有夢，再次跳出舒適圈，創立了自家食品品牌「Nicole’s Kitchen」。
三片相距千里之遙的土地，於Nicole而言各有不同的意義。馬來西亞是她的根，越南是她的追逐自由之地，香港則是她願意安定、留守下來的城市。
#在異地適應新生活
「當年畢業後喺馬拉從事媒體行業，機緣巧合下訪問過一間國際公司，覺得我幾有魄力，比機會我去越南幫手打理公司，當年係個廿歲出頭嘅『𡃁妹』，難得有機會出國闖蕩下緊係開心，諗都唔諗就應承咗。」她笑笑口說。
經過一輪考核和培訓後，當時這位「𡃁妹」便穿上正經八斗的套裝，踢著對高跟鞋，在異地擔任著管理一班當地人的工作。「當地人會分『阿姐』、『阿妹』，我死都扮成熟話自己係30歲，因為驚管唔掂班同事。一開始語言不通，靠翻譯員協助溝通，鬧出唔少誤會，例如明明我提大家要記得食飯，翻譯員就講成『做完嘢先好食飯』，當時大家黑黑哋面，我都不明所以，後來有人提番件事我先知道。」
不過Nicole勝在肯捱，即使不時要由早做到晚，還是努力偷時間學習當地語言，開始拉近與同事間的距離。「越南人好單純，同佢哋傾到計、講下笑後，大家就開始對我好熱情，就算開工做到好辛苦，請下大家食飯就會好開心，亦試過請我去佢哋屋企食飯，仲記得我同一家好多口一齊鋪報紙坐地下，感覺好溫馨窩心。」在她離職之時，一班同事更夾份為她送上一束花，亦不時寫信給她，令她非常感動。
#有愛的地方就是家
想起那段青蔥歲月，她微笑表示當時的日子最自由快活，亦最讓她懷念。「不過永遠唔及上屬於我嘅『家』，有愛嘅地方就是家，馬拉有家人朋友陪伴成長，亦擁有有我最為熟悉嘅味道。我希望將馬拉菜帶來香港比多啲人認識，因為對我嚟講，馬拉菜就係家嘅味道。」
至於另一個「家」，卻賦予Nicole人生不一樣的意義。「馬拉嘅家，係父母送比我嘅家；但香港呢個家，係由我同丈夫一步一腳印建立，仲生咗兩個寶貝仔，係我一生最不能割捨嘅親情。」這大概是每位母親的肺腑之言，是世上最簡單而真摯的一份愛。
正值香港風雨飄搖的日子，港人天天將移民掛在嘴邊，不少行動派更是早已為自己、家人準備好這條後路。「兩個仔可能會去外國讀者都未定，但我同老公目前都希望留喺香港，逃避、『棄船』有邊個唔識，可能我喺唔同地方生活過，明白每個地方都有自己嘅問題，既然我當初選擇成為香港人，就希望努力去愛香港，喺能力範圍內做到最好，呢個就係留守香港最好嘅理由。」
圖片來源： Nicole’s Kitchen Hong Kong
#StartChing #StartChange #hongkong #homekong #hk #hkstory #business #startup #hkstartupers #dreamer #MadeInHK #comfortzone #bold #life #香港 #香港人 #追夢 #創業 #人物故事 #香港品牌 #香港製造 #舒適圈 #勇敢 #家 #馬來西亞 #馬拉 #越南
＝＝＝＝＝
【本月主題：科技Ching】
＝＝＝＝＝
StartChing 的團隊是由幾位90後媒體人組成，希望用文字和影片分享本地追夢者的故事，一同成就彼此的夢想。
Follow其他社交平台： linkby.tw/StartChing
如欲與我們分享你的故事，歡迎電郵至：[email protected]
