一雙手做出懷舊美食萬花筒，風火女生：創作是我生命的抒發位——十兄弟工作室 Tenfingersworkshop
手執一個懷舊紙皮石圖案的圓筒，放眼看進一端的圓孔中，充滿夢幻與童真的景像盡在眼前——栩栩如生的迷你蛋撻、菠蘿包、砵仔糕等香港懷舊美食以趣怪的呈現。
由十兄弟工作室推出的全新作品「香港美食萬花筒」，讓人在瞬間忘卻紛擾煩亂的世界，反璞歸真，從另類角度欣賞這個城市美好的一面。
「我好慶幸能夠搵到賦予自己生命嘅事情，創作係我生命中嘅抒發位，無論係社會上嘅不安、生活嘅煩憂，我都將呢啲情緒投入其中。」這個萬花筒的創作者若曦道。
#手作浪潮中的倖存者
若曦在大學時期創立的十兄弟工作室，以樹脂黏土做手作，用一雙手創造出屬於香港人的平民美食天堂。
製作「#微縮世界」的手作人大有人在，不過若曦的工作室能夠在文創界闖出一番名堂，皆因她在年月間發展出一套相對成熟的生意模式，以香港情懷為賣點，除了零售或定製精品飾物、材料包、情景盒等產品外，亦舉辦工作坊、學校教學班，甚至是跨媒體藝術創作和展覽。
說到手作行業情況，她表示每隔一陣子便會有一輪「#手作浪潮」出現，而這個現象與經濟環境不無關係。
「例如係呢一年疫情多咗人失業，自然多咗人加入手作行頭，不過每次『浪潮』過後，留得低嘅人實在唔多，因為手作喺香港真係難搵食，當初我勝在夠後生，一個學生哥唔會太計較錢，有時為咗攞經驗，連車錢都蝕嘅Job都照做，一直慢慢捱落嚟。」
她笑言，除了在收入上「難捱」外，在創作過程中的孤獨感亦不是人人「捱得起」。「講緊由一個Idea發展成出得街嘅產品或教學班，可能要成幾個月時間，你要習慣喺創作過程中，無人會理解自己做緊咩，可能到作品出爐時就會明白，但當下嘅明暸係無咩可能。」
#隨環境存在的風火女生
在過去幾年間，若曦由拼搏事業的單身一族，變成人妻人母，在心態自然有一番轉變。「睇番幾年前嘅訪問，講嘢好有火，提及好多希望改變香港呢個文化沙漠嘅願景，近年身份上嘅變化，加上香港政治環境、環球疫情嘅影響下，實在有太多不安、無力感籠罩，令我傾向希望能夠平安、健康咁度過每一日。」
在兼顧家庭與事業之間，她認為無須執於追求完全平衡或完美。「家庭事業都要做到100分只係信仰嚟，邊有可能做得到，好似近兩年大家經常講嘅Be Water，其實係窮一生都未必追求得到嘅精神價值，唔好對自己太過苛刻，凡事盡力就好。」
若曦的一位老師曾經以四字「風風火火」來形容她，「呢四個字無話褒義定貶義， 我覺得好代表到我生命，面對好多風雲色變，我都隨環境而存在。好似作為手作人咁，生於香港、留守香港，就要接受香港呢個環境，無辦法好似日本匠人咁能夠獨沽一味，一門手藝做幾十年，喺香港生存就係要不斷求變。」
文： 高妹記者
圖： 十兄弟工作室 Tenfingersworkshop
#StartChing #StartChange #hongkong #homekong #hk #hkstory #business #startup #hkstartupers #dreamer #MadeInHK #香港 #香港人 #追夢 #創業 #人物故事 #手作人 #美食天堂 #懷舊小食 #街頭小食 #蛋撻 #菠蘿包 #砵仔糕 #童年回憶
＝＝＝＝＝
【本月主題：香港製造】
＝＝＝＝＝
StartChing 的團隊是由幾位90後媒體人組成，希望用文字和影片分享本地追夢者的故事，一同成就彼此的夢想。
Follow其他社交平台： linktr.ee/startching
如欲與我們分享你的故事，歡迎電郵至：[email protected]
