當訪問Mirror時遇上花姐，私家音樂：嚇到嗰心離一離！——私家音樂
本地人氣男團 #Mirror 的新節目《#調教你Mirror》正式出街，成為不少港人的熱話。上周提及兩位在工餘時間經營音樂平台「私家音樂」的Issac和Johnny，去年訪問過Mirror其中兩子 柳應廷 Jer Lau及 Anson Kong 江𤒹生，對此他們不少朋友均羨慕不已（包括記者）。——私家音樂
雖然二人團隊打理平台已有一段日子，在訪問拍攝上早已身經百戰，不過他們形容當日的訪問相當「驚心動魄」。
「因為當日好多媒體輪住訪問佢哋，所以只係安排到半個鐘比我哋做晒兩個訪問，講緊平時啲訪問可以比成個鐘時間我哋慢慢傾，所以由Set機、影相、拍片到訪談都非常緊湊，全部環節我哋事前諗得清清楚楚。」
負責拍攝的Johnny更講笑表示，當時被陪伴Mirror兩子拍攝的 #花姐「嚇到嗰心離一離」。「其實花姐好Nice，但當佢唔出聲，伸過頭過來望下我影成點嗰下，真係緊張到就嚟呼吸唔到，咁大嗰仔未試過比一個女人氣場震懾到！」
#沒有TakeTwo的拍攝
至於Issac最大壓力的一次，則是近期與 莫文蔚 Karen Mok 的訪談。「係我開台以嚟最『天后級』嘅受訪者，喺短短一星期準備時間當中不斷做功課，往時寫好問題後都好少跟逐條問，都係傾到邊問到邊，但當日真係一字不漏咁問問題，仲緊張到胃痛添！」他笑笑口說。
他坦言，每場拍攝永遠沒有「Take Two」，因此希望能夠做到盡善盡美。「好似Mirror同莫文蔚咁，同到佢哋做訪問真係好難得，未必有第二次機會，如果中間有咩甩漏，錯過咗就係錯過咗，所以真係又大壓力又刺激！」
#香港樂壇是一池死水？
談到近年人人都說香港樂壇已死，Issac認為與過去十年香港情歌氾濫不無關係。「情歌市場大，唱片公司為迎合市場就起勢出情歌，年月間建構咗『香港樂壇只係得情歌』呢個刻板印象，明明一路都有唔同音樂類型，但永遠都唔多人留意。」
不過在今年的 #叱咤、#ChillClub 頒獎禮推出後，似乎重新吸引港人對本地樂壇的關注，而且亦有行不同曲風的新一代歌手跑出。
「以往跑出嘅除咗情歌，往往就係好似《人來人往》、《明年今日》呢類講大道理嘅歌，當然都好聽，但對後生仔嚟講就有啲離身。例如係 陳蕾 Panther Chan 首講打機嘅歌《屈機》，或者係 Serrini 首《油尖旺金毛玲》，講下新一代嘅話題，呢啲歌其實都好有Market架！」
Johhny以 鄧小巧 《雲吞》的一句歌詞「面對這一池死水，還是間中翻滾」，來形容香港樂壇。「好多人覺得香港樂壇已死，見到唔識嘅歌手得獎就會講句『呢個乜水』。但面對呢一池死水，其實仲有好多歌手、台前幕後一路苦苦支撐，只為能夠令樂壇間中翻滾，希望我哋作為香港人，都可以繼續撐廣東歌！」
文： 高妹記者
圖： 私家音樂
#StartChing #StartChange #hongkong #homekong #hk #hkstory #business #startup #hkstartupers #dreamer #MadeInHK #hkmusic #香港 #香港人 #追夢 #創業 #人物故事 #香港音樂 #香港樂壇不死 #香港樂壇 #香港歌手 #廣東歌
＝＝＝＝＝
【本月主題：香港製造】
＝＝＝＝＝
StartChing 的團隊是由幾位90後媒體人組成，希望用文字和影片分享本地追夢者的故事，一同成就彼此的夢想。
Follow其他社交平台： linktr.ee/startching
如欲與我們分享你的故事，歡迎電郵至：[email protected]
