本地初創搞共融跑步班，讓港女與少數族裔女性一起跑！——Ladies Run
「平時行街經過見到包晒頭嘅少數族裔女仔，行過就行過，你唔會專登同佢Say個Hi架嘛。今次參與咗呢幾堂『#共融跑步班』，每星期抽2個鐘同呢班女仔跑下步、傾下計，令我發現原來共融從來都係只差一步，只係需要你嘅參與。」Ladies Run的參加者Audrey分享道。
Audrey任職於本地NGO，向來對少數族裔的議題頗為好奇，因此在FB見到活動宣傳後便決定報名參與。「我從來無接觸過少數族裔，可能同自己性格或工作背景有關，一直希望了解呢班社群，加上同一班女仔跑下步好似都幾開心咁，就決定參與下啦！」
短短幾堂的跑步班，成為港女與少數族裔女性之間的一條紅線，在跑跑跳跳、互相扶持的過程中加深了解，建立出一份「汗臭」友誼。
「女仔之間咩都會講一餐，又互相拍手鼓勵，都幾開心架！不知不覺間建立咗每星期同佢哋見面、跑步嘅習慣，跑步班臨近尾聲都幾不捨，所以大家提出未來可以繼續約出嚟，成為長期『跑友』！」Audrey開心表示。
#跑步過往中互相扶持
Ladies Run是Good Seed最新一輪的培育項目，由創立三年、專門籌劃運動比賽的本地公司「體育活動策劃專家」今年首度舉辦，希望透過跑步班連結本地及少數族裔的女性，讓她們跟專業教練學習跑步技巧、強身健體之餘，亦能在過程中互相扶持，推動共融。
活動搞手Wendy指出，社區上為少數族裔女性推出的活動，一般以靜態活動為主，例如是手作、烹飪或語言班等。「出去做運動一件咁普通嘅事，對呢班社群嚟講一啲都唔普通，尤其係衣著較為保守，長期包住頭巾嘅女性，佢哋礙於家庭、信仰壓力，未必會出去做運動，但其實佢哋係有咁嘅需求；加上我哋相信運動能夠打破人與人之間嘅隔膜， 就決定用呢個方式推動共融！」
Wendy作為搞手，每一堂均有一起參與，當中有不少個案令她相當感觸。「有一位媽媽生完小朋友後專心相夫教子，無咩機會出街識朋友，身形喺幾年間慢慢走樣，佢好希望透過參加呢個班，好好享受『Me Time』、搵番自己。」
其中亦有學員因故退出課程，「一開始有一對母女參與，我仲記得位囡囡當日有啲唔舒服，但堅持陪媽媽嚟，因為佢知道媽媽實在太耐無接觸社會，只可惜佢哋上完一堂就退出咗，簡單以『個人原因』作為解釋，可能係家庭上有唔少壓力都未定，始終我哋無辦法真正了解佢哋處境。」她感嘆道。
#成為香港一份子
跑步班只是一條紅線，將大家連結過後，關係並不再僅限於課堂之內。「其中一位參加者Amrita嘅家人身處喺不同國家，過去一年喺疫情下無見過面，自己一個喺香港生活當然會覺得寂寞，所以前排我去行山邀請埋佢。佢話認識到我嘅家人朋友好開心，覺得自己好似真係變咗香港人，成為咗呢個城市嘅一份子。」Wendy分享道。
Ladies Run的課堂尚未終結，Wendy表示希望接下來幾期跑步班，能夠繼續讓更多少數族裔女性結交到朋友，進一步融入社區。
「少數族裔女性唔係我哋想像中咁保守、難以溝通，佢哋都好希望能夠認識更多香港人，原來只係跑下步、行下山，已經可以令呢班社群有歸屬感。我相信只要願意尊重、真誠對待佢哋，共融真係一啲都唔難。」
文： 高妹記者
圖： Ladies Run
GoodSeed #StartChing #StartChange #GoodSeed #prototype #社創 #社會創新 #社創基金 #hongkong #homekong #hkstory #business #startup #hkstartupers #dreamer #MadeInHK #香港 #香港人 #追夢 #創業 #人物故事 #共融 #少數族裔 #女性 #運動 #跑步 #LadiesRun
＝＝＝＝＝
【本月主題：香港製造】
＝＝＝＝＝
StartChing 的團隊是由幾位90後媒體人組成，希望用文字和影片分享本地追夢者的故事，一同成就彼此的夢想。
Follow其他社交平台： linktr.ee/startching
如欲與我們分享你的故事，歡迎電郵至：[email protected]
