給特殊需要少女一個機會，良心小店：慢慢發掘他們的長處！——abeyhandmade
「我哋所謂嘅『正常人』做嘢，都唔一定下下做啱晒、做得好；相反，只要我哋願意花時間去發掘，呢班特殊需要人士有啲地方可能做得好過我哋添，點解我哋唔嘗試畀機會佢哋呢？」阿比手造的創辦人Abey說。
上回在Abey的報道中提及，她在4年前由一位傳媒人「轉行」成為創業人，打理著一個蚊型本地果乾小店。與不少本地小店一樣，若要概括其過去幾年的創業之路，一字記之曰——「捱」。
難能可貴的是，她在「捱」的同時，仍不忘社會上被忽略的一群。「任職教育版記者時，做過有關特殊需要人士嘅訪問，發現佢哋有啲方面係幾叻，有時只需要提供適當嘅輔助，就可以發揮到佢哋嘅能力，呢十幾年嚟我一直將呢件事記掛喺心入面，希望他日有能力時能夠比到機會佢哋。」
#社會上被忽略的一群
在創業初期，她便履行多年前許下的這個承諾，聘請了一位剛從訓練學校畢業的19歲女生小慧擔任小幫手，一做便是4個年頭。「小慧幾方面都係差咁啲，IQ有80幾，又未去到弱智，佢有自閉傾向，又未去到真係有自閉症，所以佢係申請唔到殘疾津貼。好彩嘅係佢屋企無經濟負擔，但係如果長期留喺屋企唔工作、唔接觸社會嘅話，好多能力係會慢慢退化。」
不過Abey坦言，當初花上不少時間與耐性，才能慢慢發掘到小慧的長處，令她成為名副其實的小幫手。「用咗十個月時間，點解我記得咁清楚？因為佢當年係2月入職，我逐樣工作比佢嘗試，例如係擺市集、用電腦整下設計、交收送貨，但唔係好做得嚟，直到嗰年聖誕我忙到飛起，無辦法逐步指導佢做，突然發現佢最大嘅優點係做事好專注，幫手砌水果、入袋包裝、清潔佢都做得好好！」
找到小慧的定位過後，又要在溝通上磨合一番，例如Abey不在工場時，會善用手機通訊APP的各項功能遙距指導，又或是要記得在下指令時解釋清楚，以免當中產生誤會。
「因為佢有自閉傾向嘅關係，佢唔係好識表達自己，要透過觀察去了解佢。試過佢做嘢時成個人『謝』晒，望真啲發現佢面青口唇白，問幾次先知原來佢經期到唔舒服，即刻叫佢番屋企休息，呢啲位有時忽略咗，可能全日咩都做唔到之餘，又辛苦咗佢。」她表示。
「只要我唔執，我願意請佢一世。」
小慧要定期見見社工，每次被問及工作情況時，這位小幫手均會表示做得很開心，希望能夠一直做下去。「可能佢爸爸媽媽都番工，平時喺屋企未必得到好足夠嘅關心，所以我都盡量想佢覺得工作都係一件開心嘅事，例如每年生日送個蛋糕仔比佢吹下蠟燭。只要我唔執，我都希望可以繼續請佢！」Abey笑笑口說。
當生意漸上軌道後，她又聘請多一位有抑鬱症的單親媽媽，當時社工溫馨提醒表示一般情況下，一位「正常人」只能兼顧最多2位有特殊需要的員工。「原本我都無諗咁多，平時無咩事發生亦唔覺有咩問題，但有時可能忙起上嚟或有突發事情發生，就會明白到原來一個人嘅能力真係好有限，無辦法兼顧到咁多事情。」
能夠盡己所能，為弱勢社群提供機會，社會上能夠做到的僱主實在不算多。「小慧之前喺政府資助下，做過Salon嘅洗頭助理，因為呢筆資助只係得半年，半年一到佢就被人炒咗，其實對佢嚟講係好大嘅傷害，所以我最希望大家能夠善用呢班群體嘅長處，而唔係利用佢哋嘅勞動力。」
文： 高妹記者
圖： @abeyhandmade
#StartChing #StartChange #hongkong #homekong #hkstory #business #startup #hkstartupers #dreamer #MadeInHK #Community #香港 #香港人 #追夢 #創業 #人物故事 #共融 #特殊需要人士 #自閉 #抑鬱症 #工作機會
＝＝＝＝＝
【本月主題：與你共融】
＝＝＝＝＝
StartChing 的團隊是由幾位90後媒體人組成，希望用文字和影片分享本地追夢者的故事，一同成就彼此的夢想。
Follow其他社交平台： linktr.ee/startching
如欲與我們分享你的故事，歡迎電郵至：[email protected]
