無障礙資訊促「玩樂共融」，讓傷健人士一起享受娛樂！——Momenday
「真正嘅平等、共融，並唔係為傷健人士安排佢哋嘅專屬活動，而係比佢哋同健全人士一齊參與同一場活動，大家能夠好自然地做同一件事情。」本地玩樂平台「#Momenday」的兩位創辦人Vivian和Marvis說。
他們指出，傷健人士在社會上尋求娛樂時，面對著重重困難，「佢哋怕麻煩到其他人，可能只係一級仔樓梯，就已經阻礙咗佢哋參與一場活動嘅機會，能夠享受到嘅娛樂有限。既然我哋係搞玩樂平台，點解唔做多一步，令佢哋享受到大家擁有嘅快樂呢？」
#助商戶捱過疫市
二十出頭的Vivian和Marvis是浸大畢業生，在二O年時創立玩樂平台Momenday，專門整合商戶即時空位情況，在平台上以折扣價出售商戶「此刻售不出的空房、空桌、空位」，助他們提升生意額兼捱過疫市。
「我哋嘅賣點係『此刻』，以最短5分鐘至3天內嘅空位時段為主，比用家即買即玩，所以需要實市顯示到『空房、空桌、空位』嘅情況，呢個位喺數據處理上要做得好準確，暫時未見有本地玩樂平台主要做呢件事，變相成為我哋嘅優勢。」
難得的是，在建立平台的同時，他們亦不忘一班傷健人士的需要，在平台上同步提供「#無障礙資訊」，助這班經常被社會忽略的社群參與不同地區的玩樂體驗。
「例如係寫明路程幾耐、路上有無樓梯級，或者係商戶嗰邊有無『無障礙洗手間』、場所係咪一個寧靜空間等，千祈唔好睇小每一項資訊，呢啲細節正正就係呢班群體能唔能夠舒適地享受娛樂嘅關鍵！」
他們舉出需要佩戴助聽器的聽障人士作例子，「助聽器喺收集聲音時，唔識得過濾雜音，同一時間接收到人聲、廣播聲，甚至係冷氣機摩打聲，會令聽障人士好唔舒服，所以佢哋會傾向選擇有寧靜區嘅場所，或者係提供小班教學嘅工作坊。」
#EntertainmentForAll
憑他們的創新意念及社會創新元素，Momenday先後成為香港科學園前期培育計劃，以及好薈社種子基金計劃的成員，目前與40多個休閒玩樂商户合作，當中不乏耳熟能詳的品牌，包括是讓大眾體驗視障人士生活的「#黑暗中對話」。
「傾落後發現好多商戶都願意做多一步，為傷健人士提供服務，只係唔太知道點去做。除咗提供更詳盡嘅無障礙資訊外，我哋都會同商戶發掘唔同可能性，例如安排去地點便利嘅社區中心開班，比行動唔方便嘅朋友可以玩到工作坊。」
為了提供更貼地全面的無障礙資訊，Momenday亦會不時安排「#試玩專員」去各場地體驗服務，再詳盡記錄試玩後的感想。「其實係幾位有傷健情況嘅朋友自願參與，成為我哋核心小組成員。始終一般人無辦法切身處地明白佢哋嘅需要，好多細節位都未必留意得到，所以由佢哋試玩就最實際！」
作為社會大學的新鮮人，Vivian和Marvis選擇踏上創業之路，推動他們前進的，除了是「年輕不怕輸」的大無畏精神外，更是一份希望令香港變得更美好的心意。
「我哋覺得創業唔一定下下都要好爆炸、改變世界，能夠善用到社會資源，同埋為更多有需要嘅人諗多一步，都不失為一個好方向。我哋作為玩樂平台，心願好簡單，就係希望做到『Entertainment For All』，任何人都可以享受到玩樂嘅美好！」他們堅定道。
文：高妹記者
圖： Momenday
Good Seed九月會開始新一屆招募，記得密切留意Good Seed的專頁，日後將會向大家公布詳情
Good Seed HK #StartChing #StartChange #GoodSeed #prototype #hongkong #homekong #startup #hkstartupers #dreamer #夢想 #香港 #追夢者 #創業人 #社創 #社會創新 #社創基金 #玩樂平台 #玩樂共融 #傷健人士 #殘疾人士 #共融
＝＝＝＝＝
【本月主題：#當90後不再年輕】
＝＝＝＝＝
StartChing 的團隊是由幾位90後媒體人組成，希望用文字和影片分享本地追夢者的故事，一同成就彼此的夢想。
Follow其他社交平台： linktr.ee/startching
如欲與我們分享你的故事，歡迎電郵至：[email protected]
