【#與你共融】母女檔製「無障礙靚衫」，盼長者、傷殘人士活得自信——睿程工作室
選購一件衣服，對普遍人來說是稀疏平常事，有人卻是「過五關、斬六將」也未必能購得一件適合他們的衣物；在設計衣服時加入貼心細節，原來已能為一些人的人生，帶來翻天覆地的改變。
三年前創立的睿程工作室，是一間本地社企製衣廠，在港自家設計、生產「無障礙服飾」，而且每件產品都設計感十足，例如是有旗袍款式的口水肩，或是有各式花紋選擇的尿袋收納袋。
「我哋專門推出適合長者、殘疾人士或有需要人士嘅服裝，設計講求美感同實用性並重，除咗有常規產品外，亦可以為客人度身訂造，希望佢哋可以容易換衫、著得舒適，同埋打扮得靚靚、好有自信咁出街！」睿程工作室創辦人姜太表示。
受亡母經歷啟發
在創立工作室前，姜太從事製衣業多年，決定製作「無障礙服飾」的想法是源於她的亡母。「媽媽晚年時有機能衰退嘅情況，即使好小心都好，每次換衫換褲都總會整到好痛，可能係手抬得過高，拉到佢啲肌肉，我覺得好心痛，思考點解坊間無啲專用衣物，可以比老人家容易啲換衫呢。」
外出飲茶時，姜太再次為向來非常貪靚的母親感到難過。「佢要插住尿袋，又黃又有血絲，院舍嘅口水肩亦都好肉酸。明明我媽媽係一個好貪靚、姿整嘅人，點解變老後就好似無資格扮靚呢？」
她將這些感受一一放在心底，並成為日後創立工作室的契機。「我跟咗一位製衣老闆做嘢好多年，佢係生前做好多善事，亦都立咗遺囑，將一筆錢交比我繼續幫佢做善事。原本我都無諗太多，只係打算派下飯、送下暖，但有朋友提醒咗我，話我既然喺製衣上有多年經驗，點解唔好好發揮呢，令我諗到為我媽媽呢類有需要嘅人製衣嘅想法。」
「唔係一件衫咁簡單！」
過去幾年間，這間工作室迎來不同需要的人士尋求幫助，不少個案都是一般人難以理解。「有好多隱藏需要，就咁睇你係唔會知道。試過有位男士應該係有驚恐症嘅情況，佢好怕見到衣物上有線頭，搞到咩衫都唔敢著，買又買唔啱。其實呢件事要解決好簡單，我哋喺車衫時只需要運用一啲技巧，就可以將所有線頭收埋，咁就已經能夠幫到佢。」在睿程擔當設計總監、姜太的女兒Kadri說。
她們亦曾為坐輪椅的女生度身訂製連身裙，「佢哋著連身裙時，原來會因為坐住裙擺，令到衣領一直向上移而整到條頸，於是我哋就幫佢設計咗一款『Ｕ型』裙擺嘅連身裙（圓圖），將會坐到嘅裙擺位裁走。呢啲需要有時我哋真係未必諗得到，但只要為佢哋做多一步，就已經滿足到佢哋咁簡單，而又渴望已久嘅願望。」
Kadri表示，即使對象只有一個人，即使有時是「蝕本」生意，她們還是會繼續做這件事，幫到一個得一個。「穿到一件啱心水、啱場合嘅衫，其實係提升咗一個人嘅自信、尊嚴，#唔係一件衫咁簡單！」
文：高妹記者 @gomui.173
圖： StartChing、 Rhys 睿程
#StartChing #StartChange #hongkong #homekong #Startup #hkstartup #hkstartupers #dreamer #hk #hkstory #love #community #elderly #disability #香港 #香港人 #追夢 #人物故事 #無障礙服裝 #長者 #傷殘人士 #老人院 #輪椅
＝＝＝＝＝
【本月主題：與你共融】
＝＝＝＝＝
StartChing 的團隊是由幾位90後媒體人組成，希望用文字和影片分享本地追夢者的故事，一同成就彼此的夢想。
Follow其他社交平台： linktr.ee/startching
如欲與我們分享你的故事，歡迎電郵至：[email protected]
