【#追夢Ching】首創賀年玉石年糕，90後閨蜜望發達：但唔係拜金！
C: Jadery共同創辦人 Clary 
Y: Jadery共同創辦人 Yannie 
品牌由兩位香港 90 後創辦， Yannie 正職為專業化妝師，而Clary 則是主責 brand building 的 PR & Marketer。在品牌工作分工上， Yannie 主力對內如産品研發及製作，Clary 對外洽談合作、宣傳、面對客人等。
作為現實的香港人，兩位的夢想都很實際 —— 發達。並非拜金，但經歷愈多，愈了解到無論想令身邊人過得舒適順心，還是想幫助有需要的人，想可以有選擇，無錢萬萬不能
。
Q2. 為甚麼會想到揉合玉石藝術文化於食物當中？
Y：本身自己好欣賞玉石藝術同背後寓意，覺得唔同嘅玉色同紋理變化好引人入勝。而有一日蒸完年糕，就覺得熱辣辣嘅年糕晶凝通透，好似翡翠一樣；加上翡翠玉石當中嘅吉祥寓意同祝福好適合農曆新年，於是開始嘗試模仿玉石紋理製作年糕。
Q3. 今年是第一年有這個嘗試嗎？
Y：其實上年因為疫情關係留喺屋企整包點甜品已經開始做金玉年糕，不過當時只係整嚟送比親戚朋友試。
C：上年 Yannie 一做好就影咗相 send 比我睇，而由於工作經驗關係，當時第一反應係「有得做喎！」，所以叫佢千祈唔好post相比人抄橋，同時用一年時間去作改良同研發唔同味道，因此金玉年糕今年先第一次正式面世。
Q4. 製作玉石紋的過程中最大難度是甚麼？
Y：最困難嘅地方係當你唔只做一個金玉年糕，而係要大批手工生產，但每一個都要保持有好睇自然且獨特嘅玉石紋理。
C：其實翡翠玉石每件都獨一無二，無分對錯，但如果想年糕出嚟嘅色澤紋理適合打咭留念，佢嘅顔色分佈就要非常平均，咁製作時必須逐個以人手混色同檢查，人手同時間成本都大幅增加。
Q5. 食客的反應如何？收到的訂單情況？
C：喺正式推出市場之前，我哋都曾經試過去中大做 promote，當時大家第一眼見到金玉年糕嘅時候，都無辦法相信佢係可以食用，所以都覺得好驚喜；印象最深刻係唔食芫荽嘅人，試完芫荽味嘅「迎金接福」金玉年糕之後，都覺得佢可以接受。
多得朋友們嘅支持同埋幫忙推廣，我哋喺無落過廣告嘅情況之下，銷情都過得去；而其中嘅「冰清玉瑩糕」 喺開賣第二日已經全部售罄 ，但當然我哋仍然希望有更多客人可以試到我哋最signature 嘅 「綠翡翠 Ι 吉祥如意」金玉年糕 (班蘭椰子味)。
Q6. 期望今年做到的成績如何？未來會想有新嘗試嗎？
C：今年其實我哋目標只係賣哂限量推出嘅一千件，因為希望每件都做到盡善盡美所以都唔打算加單；只要大家新年時收到個刻開心，又知道金玉年糕係由 Jadery 首創已經好滿足。
Y：同時我哋亦希望呢個金玉年糕可以引起年輕一代嘅關注，令玉石「搣甩老土」 ，同走向年輕化。因此未來我哋都會希望研發更加多唔同嘅產品，同埋下年可以有更多年糕口味同款式推出！
文：肥妹記者 @fatgirl.insight
圖： Jadery / Food – Jewelry Creator
#StartChing#StartChange#hongkong#homekong#hk#hkstory#MadeInHK#business#startup#hkstartupers#dreamer#香港#香港人#追夢#創業#人物故事#女生#90後#玉石年糕#玉石#年糕#年貨#賀年#萬事勝意#Jadery#FJcreator#金玉年糕
＝＝＝＝＝
StartChing 的團隊是由幾位90後媒體人組成，希望用文字和影片分享本地追夢者的故事，一同成就彼此的夢想。
Follow其他社交平台： linktr.ee/startching
想請我哋飲杯啡？
www.buymeacoffee.com/StartChing
如欲與我們分享你的故事，歡迎電郵至：[email protected]
