【#追夢者投稿】「IT狗」真人真事版，「創業6年終於賺錢」——Sparksine & Sparktake
IT狗絕對係一套比創業人「回味」嘅好劇集。如果你有創過業，一定會有一種感同身受嘅感覺。當然，好多人會話套野好似美劇Silicon Valley。但我覺得IT狗更有香港味道，更切合我地嘅環境。
我大學畢業就開始出黎創業，當時同幾位大學同學憑住「熱情」兩隻字，希望可以「改變世界」而開始創業。睇完之後，諗起自己咁多年嘅創業故事⋯⋯
2014年當時憑住數碼港嘅創業基金（CCMF Cyberport Creative Micro Fund ＋ Cyberport Incubation），拿左幾十萬Funding，開始做App、做Website。但第一個遇到嘅大問題就係：有創業想法，冇市場。我地想做一樣野去幫人，結果冇人「需要我地」。
我地嘅第一件Product叫做Roundabuy。Roundaby係一個平台，比人買賣香港品牌。當時我地每星期都要去市集搵唔同嘅設計師、手作人。
「你地個品牌理念好好，但我都係想試下係大平台度賣野先」其中一個手作人Inbox我。
呢一句就係我地經常都會聽到嘅回應。之後我地去搵一位創業前輩問，佢就話：「香港人唔係要呢D，平，你唔夠淘寶黎，貴你又唔係名牌。唔好咁離地啦Isaac。」
「Isaac，我知道唔應該講，但你個Idea真係唔得。我勸你放棄啦。」
係零收入情況下（數碼港嘅錢係Re-imbursement）即係要你先有錢用，先可以Claim錢，我地決定要去做Fund Raising。我地第一個Fund Raising都好似劇集入面個呀信咁，有個好似Cathy Ho咁嘅人問我地有冇興趣比佢入股。
聽到呢個「詢問」，我地當然上去見佢啦。事前仲睇埋佢個背景，發現佢有好多成功嘅投資經驗。成個過程非常順利，佢亦都即場比左個Offer我地。
但係我地拒絕左，因為我地想搵一個可以同我地夾嘅人，可以令我地做好件產品。
於是，我地又搵另一個係創業界好有份量嘅人，我地Pitch Pitch下，佢叫停左我地。話我地食得屎，成件野做唔掂、內容係吹水。然後就教訓我地15分鐘。
最後，我地嘅籌錢大計失敗。成個App亦都冇好似Paypayduck咁多人用。我地決定要放棄。係停止營運之後，冇人問：「點解用唔到嘅之類嘅說話。」公司第一個Idea宣佈：「失敗。」
決定放棄當晚係2016年未，我地捱左大約10幾個月，公司得番幾萬蚊。有兩個Partner亦都已經離去。得番我同埋另一個Partner Sean。我地當時係9龍塘嘅一個涼亭，諗緊下一步。
「算啦，不如番去打份工。」Sean咁講。
「唔得，我唔服！不如諗下我地仲有d咩剩，睇下下一個Proejct做咩好⋯⋯」
我地發現自己創業時期剩低最多嘅就係「書」。於是我地就諗，好多人買完書睇完都會擺係度，就咁擺係度好晒姐，不如整一個Carousel For書。我地覺得世界上仲有好多愛書之人，而且每年有書展，個Market嘅規模應該都唔錯。所以我地諗左「Sparktake」呢個Idea，一個比人交流二手書嘅地方。
今次我地吸取左教訓，係兩個人嘅情況之下，想要做一件產品，絕對需要用Lean Startup嘅概念。於是，Sean負責用React Native ＋ Django整一個多平台嘅App，而我就負責做Marketing。
我開左一個IG Page 加用Strinkingly（專係整一頁網站嘅工具）黎介紹Sparktake。當時我地諗：「平台不如唔好收錢，反正多人用就可以有人Sponsor，可以賺到錢。」於是，係Sparktake網站頁面度我地寫左10年不收費。Sean每日寫Code，而我就去二手書群組度約人出黎交收、買賣，跟住再問下佢地Sparktake個idea如何。
「唔錯呀，可以分類。第時出左我都會用。」就係咁，Sparktake出世之前，我地已經存左大約1000個User，同埋係IG度有幾萬Followers。
「今次掂呀！」我同呀Sean講。
的確，隻App係出左之後有好唔錯嘅迴響。更好彩嘅係，當年果籽報導我地，令到隻App有好多人下載。當時好快就有過萬Download，而且好多Active User每日都會用。
我地希望個平台可以更穩定，做得更好。於是又去拿Funding。
「書？冇人睇架啦。」投資者A咁講。
「香港市場太細，冇錢賺。」投資者B咁講。
「投資你？我不如投資005。」投資C咁講。
就係咁，我地又籌唔到錢。於是，我地嘗試諗左唔同嘅Idea，希望可以係用戶身上著手，諗賺錢方法。但係我由Day1就唔想咁做，所以諗嘅方法都唔係咁好，而且冇好主動咁Promote。
時間黎到2018年，今次係真．冇錢。好好彩，有一位出版頁界嘅人話對我地有興趣，又約左我地想我地想投資我地。佢話：「不如你地試下係Sparktake將我地出版社賣剩嘅書用半價賣出去？我地半價賣比你。你地試住先。下個月我地再傾投資。」
跟住我地就嘗試用Sparktake去賣出版社賣唔晒嘅書，但係效果都係一般。一個月之後，個個前輩就話：「你地賣書嘅效果都係麻麻。咁啦，如果你一個月賣到30萬，我就投資25萬落你地度啦。」
一日之後，我地發現真係冇錢，而且唔想問屋企人借。跟住就Wtsapp佢：「不如咁啦，你投資10萬比我地先，我地再諗方法？」
「No, sorry. You have to find solution by yourself.」
呢個Msg就係最後一個收到嘅Msg，亦都意味住我地冇得再全職做Sparktake，因為真係冇水喉。於是我地就去接Freelance同埋打工，養住呢隻App。
2018年頭，我用Wordpress砌左一個網站叫Sparksine。我透過Sparksine分享我睇完嘅書入面嘅重點，希望可以幫到人用更短嘅時間睇一本書。Sparksine行Subscription model，用戶比大約$35就可以睇晒入面嘅book summary。
係推出左之後，我就send左一封email比Sparktake嘅所有人，內容大概係Sparktake營運非常困難，需要大家支持之類，叫佢地去訂閱Sparksine。
我以為封Email冇人睇⋯⋯ 點知好多人支持，原來大家都覺得Sparktake嘅理念好好，值得支持。於是，創業6年，我終於都賺錢啦。
就係咁，Sparksine一直營運到而家，係台灣、香港同埋馬來西亞已經有超過十萬人下載。今次我地唔駛搵投資者，因為用戶就係我地嘅投資者，我地只需要做好產品，就會有收入。
好，講左咁耐，呢篇野就係我，Isaac，創業咁多年嘅回憶。
有冇後悔創業？冇。
凡走過的必留痕跡，Sparktake、Sparksine改變唔到全世界，但改變到一小部份嘅人。呢個已經係人生非常值得驕傲嘅一件事。我嘅創業路賺唔到大錢，但識到好多人、學到好多野。
「你創業咁多年，做左d咩？」2018年我去見工個陣，in我嘅上司咁樣講。多謝佢呢句說話，令我冇accept佢嘅offer，番屋企用一晚時間砌左Sparksine.com出黎，當個月就賺到超過佢offer比我嘅人工。
以下係我比大家嘅小小創業建議：
1. Customer First, investor later
2. 有人投資你唔代表成功。我曾經見過一個人，我問佢：你創業做d咩？佢答：「我件product唔錯，己經有人投資。」「哦，幾好呀。」結果係佢件產品從來都冇出過。
3. Marketing好重要，產品唔會突然爆紅，所有野都需要你去做Promotion
4. 先測試Idea，先整網站/App ，唔好花太多時間好似Paypayduck咁整一隻App，因為整完之後，可能會冇人用，到時就浪費時間（測試Idea嘅工具：Wordpress、Instagram、Email Newsletter、Facebook群組）
5. 唔好妒忌人地，因為總有人係會做得比你好、賺多錢過你
6. 創業初期唔好去大學同學聚會，因為你會好自卑（我係）
7. 創業唔代表高人一等，謙虛好重要，公司得兩個人，叫自己做CEO有L用咩？
8. 創業嘅第一步，就係要先養得起自己，At least可以夠錢比你三餐依杯面
9. 想創業成功，第一步就係你要開始創業
圖： ViuTV
文：Isaac Wong , Founder of Sparksine & Sparktake
#StartChing專欄#StartChing#StartChange#hongkong#business#startup#hkstartupers#dreamer#90後#夢想#香港#追夢者#創業#Sparktake#Sparksine#香港製造#香港創科#IT狗#凌文龍#葉念信#蒙玲#陳漢娜#ViuTV凌文龍 Siulung ling楊樂文 LokmanYeung陳瑞輝Frankie Chan陳湛文 Peter ChanKaKi Sham 岑珈其YoshiYu余逸思Hanna Chan 陳漢娜A.Chow 周祉君Alina Lee 李炘頤 @Stanley Yau 邱士縉 @林家𤋮 Locker @李靖筠 gladys li
＝＝＝＝＝
StartChing 的團隊是由幾位90後媒體人組成，希望用文字和影片分享本地追夢者的故事，一同成就彼此的夢想。
Follow其他社交平台： linktr.ee/startching
想請我哋飲杯啡？
www.buymeacoffee.com/StartChing
如欲與我們分享你的故事，歡迎電郵至：[email protected]
