【#追夢Ching】港插畫師創「本地貓」為港加油，赴日參加數碼藝術比賽奪冠——Oh.Mankee
「香港加油！」簡單的四個字，今時今日意義深遠。早前插畫師Oh.Mankee出征日本限時Art Battle比賽，在台上分享摘冠感受時，不忘用廣東話說：「香港加油！」，令人動容。未走到國際舞台前，這位80後女生曾有過一段摸索期，但憑着不斷嘗試以及對插畫的堅持，終憑着夢幻可愛路線，創作充滿香港特色的三色貓「HO-KO」陪大家守護香港。
Keep住錯方向的經歷
陪她長大的只有兩個玩具——A4紙及錄影帶。「果時用錄影帶錄低宮崎駿嘅電影，然後停低畫面，喺A4紙上面跟住畫畫。哥哥亦喜歡畫畫，會教我畫畫。」中學畢業後，先後於香港專業教育學院（IVE）及香港理工大學完成有關產品設計的課程。第一份工作是設計女裝鞋。「我好鍾意鞋，但做靚鞋唔係淨係識畫就可以，仲要季季不停飛歐洲行Fair同返大陸上工廠執鞋款，算係好頻撲嘅工作，我做得唔算好開心，而且感覺未發揮到自己真正嘅才能。」之後幾份工作都是環繞自己感興趣的範疇，開始清晰了自己的目標。
工餘時在市集畫人像畫，雖賺到一點錢，但卻不是自己最喜歡做的東西。鍾意畫卡通的她坦言「Keep住行錯方向」，但也慶幸這些經歷：「女裝鞋設計涉及物料襯色，訓練到我嘅觀察能力、配色技巧、物料配搭。」、「擺市集要速畫鍛鍊到我畫畫快嘅速度」。這些對她插畫有所幫助。
人或貓 花與雲 也是香港地
她一直希望擁有自己的品牌，但始終做不出滿意角色。近幾年社會轉變很大，加上疫情，激發她要及時追夢，去年終於成立工作室「Oh Mankee Studio」。喜歡貓但又不能養貓，唯有寄情畫貓，創作了一隻三色貓「HO-KO」（怒魂），每天騎着木棉雲四出幫助身處困境中的朋友。
角色設定盡見她有多愛香港這片土地：貓名「HO-KO」取自「HOng KOng」的簡稱。賦予飛天能力的木棉雲，概念源自足迹遍佈各區的木棉樹，此樹亦叫「英雄樹」，切合「HO-KO」正義性格。「喺IG用呢隻貓嚟發表我對生活嘅睇法。而家籌備梗兒童繪本，主題講HO-KO點幫身邊人嘅故事，希望今年內推出。」
平常心出征日本參賽摘冠
今年年初她無心插柳參加「LIMITS Asian Championship」，奪得香港區冠軍後，5月出征日本的總決賽。「無論係香港區抑或總比賽，我都係以平常心，唔好畫一張太失禮嘅作品就得喇！」現場比賽氛圍令她很緊張，總決賽第一場的對手來自新加坡。「女仔嘅側面畫完又擦，畫完又擦，呢個動作重複了好多次，過咗一分鐘，對手已經畫好藍色嘅背景，淨低主角未畫，我同自己講：『唔可以再玩喇！』」她覺得完成品有點失準，幸好亦勝出。
接下來是日本對手。「果陣預咗輸，因為佢係大師級。」抽到的題目很適合她，再度獲勝，進入爭奪總冠軍一戰。「對手亦係香港，無論誰勝誰負都係香港贏，呢場我好輕鬆好Enjoy。」她亦憑「HO-KO」摘冠。
「份工畫嘢、夠養屋企，我就好開心！」
這次殊榮聲名大噪，對她是否一支強心針？她坦言：「呢個比賽鼓勵我要試多啲嘢，至於點樣帶一個Character係一場好漫長嘅路。」畢竟插畫師並不平坦，但她堅守初衷：「我日日都聽電台同埋網台，無論咩嘢故事都聽，儲埋喺腦度，留待不時之需。有時會同朋友吹水、睇展覽，睇吓有冇新嘅諗法。搵到份畫嘢嘅工作、夠養屋企，我就好開心喇！」
文：Wendy @lainga.lai
編：肥妹記者 @fatgirl.insight
#StartChing#StartChange#hongkong#Startup#hkstartup#hkstartupers#dreamer#hk#hkstory#Ohmankeeillustration#ohmankee#illustration#limits#香港#香港人#追夢#人物故事#香港製造#香港品牌#香港插畫師協會#插畫師
＝＝＝＝＝
StartChing 的團隊是由幾位90後媒體人組成，希望用文字和影片分享本地追夢者的故事，一同成就彼此的夢想。
Follow其他社交平台： linktr.ee/startching
如欲與我們分享你的故事，歡迎電郵至：[email protected]
