【#追夢Ching】三條佬開人情味Cafe(下)：連鄭志剛都幫襯過！？——Craps Cafe
上回提及，Paul與兩位友人8年前膽粗粗在石門開了間主打人情味的咖啡店Craps Cafe，幾位店主最喜歡與客人吹水，亦經常讓大家不看餐牌隨心點菜，幾年來累積了不少熟客。「好多都已經成為咗朋友，之前我中咗Covid，仲有熟客專登拎中醫比我添，大家關係好好！」Paul笑言。
早前大廈維修，店舖要暫停營業大半年，三位店主便索性放下大假，直至上月才重新開張。「其實可以轉新地方經營，仲可以做大啲添，不過我都係幾念舊嘅人，做咗咁多年有感情，亦都真係交咗好多朋友，所以都係唔捨得。」
他們在過去幾年間，守住這間樓面僅百餘呎左右的小店，用食物來與不同人結緣，當中不乏名人明星，連新世界發展行政總裁鄭志剛近日都特地來了一趟。「大家嚟得呢度，都係鍾意我哋呢份人情味，基本上我哋咩客人都傾一餐，同鄭志剛都係一樣咁傾！」
Paul憶述，當日鄭志剛未有點菜，而是讓店主們為其「發辦」，「我哋整咗蟹肉印尼撈麵比佢，原來佢係第一次食印尼撈麵，食完都話幾正，而家等緊佢嚟第二次！」
「物無美惡，過則為災」
Paul很慶幸與兩位友人的價值觀相近，對錢銀不太在看重，能夠依從自己的心意經營這一間小店，「只能夠講，我哋呢一套長期有一班熟客支持，一定唔會蝕錢，但同時都好難做得大；我哋三位勝在無生小朋友，又唔係得單一收入，所以經營呢度都係求開心！」
快將踏入知命之年的他，形容自己是一個樂觀的人，追求活得自在開心，「我覺得做人唔一定要求向上流，唔同位置嘅人都有自己嘅痛苦，無需要特別眼紅人，正所謂『物無美惡，過則為災』，過於執著只會令自己活得唔開心，遇到控制唔到嘅事，選擇放下不失為一個好方向。」
在財富與智慧之間，他會選擇後者，「做生意叻、有知識嘅人多，有智慧嘅人少，智慧係來自歷煉，係要自己慢慢睇化。人生短暫，能夠盡情喺自己嘅生活層面體驗唔同事物，唔好等到老先至後悔，我覺得已經好好。」
文：高妹記者 @gomui.173
圖： Craps Cafe
#StartChing #StartChange #Homekong #追夢 #人情味 #咖啡店 #小店 #石門 #石門餐廳 #鄭志剛
＝＝＝＝＝
StartChing 的團隊是由幾位90後媒體人組成，希望用文字和影片分享本地追夢者的故事，一同成就彼此的夢想。
Follow其他社交平台： linktr.ee/startching
如欲與我們分享你的故事，歡迎電郵至：[email protected]
