【#追夢Ching】三條佬開人情味Cafe，唔睇餐牌直接點菜都得？！——Craps Cafe
位於石門工商廈林立之間的 Craps Cafe ，樓面面積大約只有百餘呎，座位不多，開放式廚房亦是一目了然，三位店主經常一邊在廚房工作，一邊與進店的客人打招呼，又或是與一眾食客搭下嗲、吹下水，氣氛樂也融融。
石門首間咖啡店
沙田石門前身屬工業區，近年逐步轉型成為商貿中心，自京瑞廣場落成後更是吸引了不少食肆進駐，8年前開設的Craps Cafe則是區內首間咖啡店，「理論上唔算係第一間，因為我哋係頂手咗一間只係開咗半年左右嘅Cafe嚟做，想當年呢頭真係咩都無架！」店主之一的Paul憶述。
記者光顧過Craps Cafe兩次，與幾位店主吹過幾句水，亦感受到他們的樂在其中；起初以為這間咖啡店的創業故事不外乎是由興趣而生，幾位熱愛烹飪的男士聚在一起，一時興起便聊出個創業大計，繼而互相拉對方下水，成就彼此的夢想云云。
「絕對唔係呢回事！」Paul笑笑口說，「想當年我哋無人識煮嘢食、無人識沖咖啡，大家就連碗都未洗過，真係傻下傻下衝咗入飲食界！」
Paul原本在物流行業打滾十多年，因為當時行業不景氣的緣故，一下子被裁員加入失業大軍，「好突然，亦都好唔甘心，又覺得打工好無保障，就心雄想自己做老闆闖出一番事業！」
探索好一陣子後，當時家住石門的他，遇上當區一間虧損中的Cafe正找人頂手，「當時位老闆都係為追夢開咗間『一個人的咖啡館』，可能太過浪漫主義，無考慮到實際經營問題而做唔嚟；我一入去已經好鍾意間Cafe，無點講價就直接頂手做，又拉朋友一齊搞，大家初嘗做老闆嘅滋味。」
原來，互相拉對方下水是真，成就彼此的夢想亦是真，只是興趣這一環猜錯了。
摸著石頭過河
雖然沒有下廚經營，不過Paul勝在愛食又識食，所以經常四出光顧不同餐廳「搵食」，又有多年炒股經驗，向來習慣閱讀年報以了解公司業務情況，因此對做生意有一定理解。
「當時石門只係得茶記，我就加入三文治、沙律呢類當區無人賣嘅嘢，基本上將間舖起死回生，頭一兩個月已經做到收支平衡；之後都係摸著石頭過河，一路經營一路學習，過兩三年後開始有一班熟客會長期支持。」
在過往的「搵食」經驗中，Paul留意到半島文華的成功之道，除了是做好食物品質外，更在於與客人的互動，「通常你同廚師熟咗之後，你係可以嗌下餐牌上無嘅菜式，大家又會好似朋友咁傾下計，客人亦會因為呢種互動更加享受呢餐飯！」
因為Paul便決定將這種服務態度帶到自己的Cafe，「我哋呢度嘅嘢食OK啦，但勝在人情味濃，大部分客人我都記得名架；大家嚟到唔一定要睇住餐牌嚟嗌，有咩想食同我哋講聲，煮到咪煮囉，希望大家嚟到唔止係可以醫肚，而係可以盡情享受喺度坐低嘅時間！」
文、圖：高妹記者 @gomui.173
#StartChing #StartChange #Homekong #追夢 #人情味 #咖啡店 #小店 #石門 #石門餐廳
＝＝＝＝＝
StartChing 的團隊是由幾位90後媒體人組成，希望用文字和影片分享本地追夢者的故事，一同成就彼此的夢想。
Follow其他社交平台： linktr.ee/startching
如欲與我們分享你的故事，歡迎電郵至：[email protected]
