如果呢一刻叫你分享10樣你成世人鍾意嘅嘢，你嘅答案會係咩？
小編學堂已經上咗兩期，第一堂一開始我哋會派張紙比同學，寫低自己「成世人最鍾意嘅嘢」，多數同學寫咗頭兩個就停咗手，我叫佢哋慢慢寫，一時間諗唔到唔緊要架，可能上上下堂突然有靈感都未定呢～
寫完之後有咩用？當然就係比大家探索一下開page主題嘅方向啦，做內容創作嘅貼士技巧好多，但我哋深信最重要嘅，都係要自己好鍾意好鍾意先！
呢個小任務幾有趣，可以見到呢班00後究竟係點樣嘅年輕人，最常見嘅答案係「食嘢」、「玩」、「聽歌」、「Shopping」，亦有同學好鬼型棍，鍾意「哲學」、「電單車」同「滑板」！
有位女孩子嘅答案都令我幾深刻，除咗音樂之外，最鍾意嘅係「一個人的世界」、「安靜的角落」（咁上下啦），佢的確係一位幾文靜嘅女仔，不過慢慢接觸之後都願意分享多咗自己嘅諗法，經營嘅IG PAGE表現都好好添！
呢個POST打到呢度，突然驚覺，自己好似都無專登寫低自己成世人最鍾意嘅10樣嘢啵，不如我哋而家一齊寫下？
