善用 #碎片時間
當大家每日返放工來回大約2個鐘，一星期五天工作日10個鐘，一個月40個鐘，一年就480個鐘⋯⋯當你比一半時間自己休息，有240個鐘都夠寫好多內容啦
係人都知嘅道理，有恆心先得架，所以呢，最近我就真係試下實行「碎片時間大計」，開咗嗰 @oldshop.magazine ig，搭車得閒就上網搵下資料、打下內容，估計花咗1/5嘅搭車碎片時間（放空都好重要嘅
），一個月已經出咗10個post，無額外花時間搞嚟講，我都好滿意架啦～ 大家都不妨試下！
邀請他人參與
開展新大計前可以先同朋友分享，除咗當係市場調查外，亦可以督促自己，話晒都同朋友講咗要做，點都會有多少少動力比自己起個頭嘅
另外，以@StartChing 嘅專訪故事，或 #今晚聽首廣東歌 系列為例，我哋都會邀請唔同人參與～
當人哋付出咗時間分享自己嘅故事，或者係分享嘅內容好正，無論係責任定愛，都會為我哋帶嚟動力去出post，甚至係花預算以外嘅時間寫好呢個post，高質素嘅內容有時就咁係誕生
一切從簡
如果下下都追求完美，好大機會拖慢出post進度，甚至係做到一半胎死腹中～
大家可以將出post門檻降低，例如係由用電腦 #Photoshop 修圖設計，改成用手機app搞掂，隨時隨地都可以做到，再善用碎片時間，咁就無藉口話唔得閒出post啦！
從興趣出發
好似好廢，但呢個先係最緊要
都係用番 @oldshop.magazine 做例子，以往訪問工作時儲咗啲存貨當然幫到手，但都要平時生活有留意下老店，先至可以持續出到post；比如當初我都係行過見到間冰室好靚，明明趕趕地時間，明明已經行走咗，都係忍唔住行番轉頭影張相，後來先發現原來係幾出名嘅永香冰室嚟
唔需要同其他page比較，唔需要覺得自己唔夠專業，只要有興趣有熱情，你就會喺日常中留意到相關題材，成就到一個又一個好post
