【#與你共融】走入社區做親民價「樹窿」，以藝術治癒街坊情緒——Not a Gallery
「好多時候唔識講或者唔知點樣講我哋嘅感覺，但透過平面或立體創作就可以好具體咁將感覺、情感表達出嚟。」英國註冊藝術治療師梁靜韻（Gigi）娓娓道來藝術治療的作用。
幾年前她跟拍檔決定以藝術療癒人心，還以親民價服務弱勢社群。近年更搜括促進精神健康的工具，透過一些簡單遊戲提升自我及生活的覺醒，扮演着一個社區的樹窿，幫助大家自己情緒自己救。
Gigi大學畢業於創意媒體，後從事殘疾人士藝術發展的工作。一直都想進修藝術治療，期間曾遠赴英國修讀為期一星期的藝術治療基礎課程，她發現當地很多藝術家及設計師都選擇報讀這課程，反觀香港這類界別的人士卻很少對這領域感興趣。
工作了五、六年後，希望在職場有所突破，決定到英國攻讀藝術治療碩士，期間令她大開眼界。當地的藝術治療師會在街市或者小區後巷開舖，走進社區服務。成為英國註冊藝術治療師後，2018年便與拍檔記錄片導演黃肇邦在北角城市花園商場開設藝術治療空間「Not a Gallery」，走進社區療癒人心。「我希望畀Client多一個選擇，見完治療師，打開門就係人來人往、有城市聲音嘅社區。」
精神健康平時亦要練習
機緣巧合幸得基金贊助，2020年於灣仔集成中心開設香港首創紀錄片概念店「SINCE Concept Store」，並把「Not a Gallery」遷往店中一角繼續服務，同場還售賣一些促進精神健康的工具。至於北角舊店則轉型為倉貨。
店址雖變，但不變的是Gigi對療癒社區的信念。她坦言自己的角色比較被動，地舖更便利有需要人士可在一個毋須預約的地方找到服務，亦讓一般人或專業人士選購到提升心靈的工具如探索自我的卡牌。「做運動為咗強身健體，咁情緒健康平時就唔使練習？其實透過呢個DecentraIize嘅方法，令大家唔需要有人傍住都可以幫自己改善精神健康，避免問題惡化。」
不斷承受孤獨=食15支煙
她引述，年幾前英國一項研究發現，疫情令人們減少70%觸碰物件的次數。「皮膚係一個好好安撫我們情緒嘅方法，但喺科學嘅角度，呢個係傳染病毒嘅幕後黑手。我最擔心小朋友嘅個人成長，因為六歲前喺瘋狂嘅探索期，但疫情下乜都唔准摸。口罩將我哋面部表情遮咗七成，只係得返眼睛，試問而家三、四歲嘅小朋友點學習閱讀人呢？而家好多小朋友都有依附嘅問題。」
如何減低疫情對心靈的衝擊？她建議寫日記，只花五分鐘用短短的五句、十句，寫下當日發生的事情，有助提升對自我及生活的覺察力。另外亦不妨多跟身邊人或朋友連結。「英國紅十字會講過如果一個人不斷承受孤獨嘅感情，等於每天食15支煙。」
「搵人幫唔係醜事」
跟很多中小企一樣，她亦面對租金、人手不足等經營壓力。但看到服務受眾如何由低谷慢慢站起來，證明堅持是值得的。「有啲個案完結咗，但當佢突然Down嘅時候，又再Text我想搵我幫手，呢件係一件好好嘅事。香港人要有覺察力，當情緒麻麻嘅時候，搵專業人士幫手其實係Work㗎，搵人幫亦唔係一件醜事。有啲客買咗卡牌同朋友、屋企人玩，玩完之後發現關係改善咗，呢啲都係我哋好樂見到嘅畫面。」
文：Wendy @lainga.lai
編：肥妹記者 @fatgirl.insight
#StartChing#StartChange#hongkong#Startup#hkstartup#hkstartupers#dreamer#hk#hkstory#mentalhealth#mindfulness#art#ShallWeTalk#NotaGallery#SINCEConceptStore#香港#香港人#追夢#人物故事#香港製造#香港品牌#藝術治療#精神健康#藝術治療師
＝＝＝＝＝
StartChing 的團隊是由幾位90後媒體人組成，希望用文字和影片分享本地追夢者的故事，一同成就彼此的夢想。
Follow其他社交平台： linktr.ee/startching
如欲與我們分享你的故事，歡迎電郵至：[email protected]
