【#與你共融】兔奴耗盡積蓄自發救兔，去年救203隻棄兔找新家
正值兔年，有否萌生養兔的念頭？Winky自小喜歡動物，並立志成立動物收容所，2015年成立facebook page「兔廬」，以拯救棄兔為己任，曾獨個兒出錢出力支撐專頁近5年之久，直至遇上拍檔阿B，組織規模愈搞愈大，去年接獲203隻棄兔。雖然做到辛苦，但感到開心、有意義，尤其是當主人領養棄兔時，對她們說：「如果唔係你哋，我就遇唔到佢喇！」
🔹為了救兔仔轉半職工作
Winky初時養貓，後來養兔子，之後發覺香港對此動物關注甚少，2015年同幾位兔友成立facebook page「兔廬」，拯救棄養兔子、暫託同幫佢哋搵屋企。約半年至一年之間，拍檔逐一離開，最後只剩下她一人，為了可隨時拯救兔仔，更由全職轉為半職，銀行戶口長期維持四位數字。「有啲有心兔友喺經濟上Support『兔廬』。不過我無搞活動嘅經驗，做嘅嘢始終好有限，一年最多救到廿隻兔仔。」
🔹最高峰屋企有10隻兔仔
她家不時暫託兔仔，最高峰曾試過有10隻（有4隻是自己養的），也是最難忘的經歷。某凌晨她收留了一隻棄兔，摸其腹部有點異樣，經醫生檢查後，知悉牠快要生產。「我心諗都幾大鑊，因為佢骨瘦如柴！點知睇完醫生過兩日就生咗5個BB。兔媽媽唔夠奶，BB自然唔夠營養。」她不停找方法，試過餵動物奶粉，但營養不及兔奶。亦在網上群組試找剛生產的兔媽媽，雖然找到，但因生完個多月奶水不多，加上不是自己的孩子，牠有點抗拒。「心情好難過，你做啲嘢都幫唔到佢哋，最後逐一喺一個禮拜內走咗。」
🔹「一個人堅持咁耐，唔簡單」
獨力經營接近5年，曾有放棄的念頭。「又要返工又要兼顧好多瑣事，幾日先覆到Inbox嘅Message，我覺得好攰。準備結婚生仔嘅時候，老公同我講：『如果第時要出去救兔，你係咪唔理個仔就咁衝出去？』所以諗過放棄。」
但她仍然堅持，2021年還結識到阿B這位新拍檔，當初她只是想領養兔仔。「知道『兔廬』亦有領養，但傳訊息後通常要等幾日先有回覆。有次我『搲水吹』：你係咪得一個人，我都可以幫手喎？Winky外表好斯文，但內心有團火，一個人堅持做咁耐，唔簡單，所以當佢邀請我合作果陣，我秒速答應。」
🔹讚好數字1年內升5倍
自此二人分工合作，Winky負責內務，阿B則對外宣傳，同年年底註冊為合法社團。專頁的「Like」由二千幾個增至過萬，拯救數量由以前每年廿隻，去年就接獲203隻，當中約8成被領養，亦不時舉辦領養活動。
究竟阿B有何神奇魔法令規模愈搞愈大？「出面拯救到八至九成嘅兔仔都係交畀我哋，Winky本業做得好，我純粹係幫佢Sell出去。同埋加入一段時間後，都了解Winky以及其他義工擅長嘅嘢，所以我相信只要將佢哋擺喺合適嘅崗位，力量就可以倍增。」
🔹給打算養兔的人的建議
對於打算養兔的人，不知她們有何建議？Winky說：「要有耐性，因為兔仔會周圍咬嘢，唔喺大眾印象中咁溫馴。亦要考慮埋家居環境，因為同胎兔仔都未必可以同籠。你有十幾年對住兔仔嘅責任，所以生涯規劃裏面亦要包括埋兔仔，當你結咗婚有咗小朋友，點樣兼顧埋兔仔呢？屋企人嘅支持好重要。『子彈』亦重要，兔仔睇一次醫生要幾千，甚至幾萬蚊。阿B補充說：「至於買咩物資最合適，可以等我哋批咗領養之後，再慢慢預備都未遲，我哋都會提供協助。」
文：Wendy @lainga.lai
編：肥妹記者 @fatgirl.insight
圖： 兔廬－Tolobunny
#StartChing #StartChange #hongkong #Startup #hkstartup #hkstartupers #dreamer #hk #hkstory #香港 #香港人 #追夢 #人物故事 #香港製造 #香港品牌 #兔廬 #Tolobunny #領養兔 #領養小動物 #救兔 #棄兔 #養兔 #生命教育 #毛孩 #領養不棄養 #生命教育
＝＝＝＝＝
StartChing 的團隊是由幾位90後媒體人組成，希望用文字和影片分享本地追夢者的故事，一同成就彼此的夢想。
Follow其他社交平台： linktr.ee/startching
如欲與我們分享你的故事，歡迎電郵至：[email protected]
