為生果創造更多可能，果乾達人無常中尋出路——阿比 · 手造 Abey Handmade
過去幾年，在香港大大小小的限定市集中，總有機會遇上「阿比·手造」的小攤檔，售賣著本地製造的水果乾、波板糖及各式手造產品，旁邊豎立一個名牌寫著：「#一個生果的可能」
阿比·手造的創辦人Abey原本任職傳媒，十年前因濕疹問題開始研究水果酵素，自此與水果結下不解之緣。「由酵素開始慢慢發展成水果乾，一開始係翻住工經營，無奈幾年前遇上大裁員，之後就索性全職創業，建立屬於自己嘅品牌！」
近日Abey忙碌奔走於觀塘工作室與炮台山之間，皆因這個本地品牌即將踏入另一個里程碑，由限定市集做到實體店。「炮台山富利來商場原本係一嗰幾『噏耷』嘅死場嚟，早排有位設計師成功遊說業主以平價出租，活化成新據點之餘，又可以幫到我哋一班本地手作人、小店。」
在新店舖中，Abey將會建立一個小小的「展區」，展示品牌的果皮蚊香系列，亦讓人認識到品牌「內服外用」兼備的特性。
「生產果乾過往中會製造大量果皮，希望可以貫徹自己『一個生果的可能』嘅理念，試過磨粉做色素，又試過自製肥料，最尾發現果皮蚊香效果唔錯，又天然又有果香味！」只是礙於以往市集擺放產品的空間太少，難以向外界展示，「而家有埋實體店就唔同晒！」
#疫市下的小店
在過去一年疫情的籠罩下，一眾小店舉步維艱。「創業4年，由咩都唔識，捱咗頭兩年後叫做開始知道一門生意要點經營，又多咗人認識，有人搵下我合作擺市集、開下班，啱啱走上軌道之際就遇上運動同疫情。」
面對疫境，Abey比起因疫情而停工父母看得開。「上一代經歷香港經濟起飛嘅年代，幾十年以嚟未試過無工開，對佢哋嚟講呢個係常態，所以會好唔適應；反觀我只係創業4年，2年向上走、2年走下坡，我又覺得OK喎，咪喺無常中搵方法求生囉！」
樂觀有時，悲觀有時。每次在心中的那團火快將滅熄之際，她總會環視一下一手建立的工作室，讓自己再振作起來。
「經營一門生意係會有千萬樣嘢打擊你，但又會有好多事情鼓舞到你，例如係廚房牌照又要續期，我望下呢個運作得好好嘅工作室，就會叫自己快啲醒，又或者係突然又會有朋友介紹我去炮台山開實體店，一路撥旺我團火，推動我向前行！」她笑笑口說。
文： 高妹記者
圖： 阿比 · 手造 Abey Handmade
#StartChing #StartChange #hongkong #homekong #hk #hkstory #business #startup #hkstartupers #dreamer #MadeInHK #香港 #香港人 #追夢 #創業 #人物故事 #水果乾 #小店 #本地品牌 #香港品牌 #炮台山 #富利來商場
＝＝＝＝＝
【本月主題：香港製造】
＝＝＝＝＝
StartChing 的團隊是由幾位90後媒體人組成，希望用文字和影片分享本地追夢者的故事，一同成就彼此的夢想。
Follow其他社交平台： linktr.ee/startching
如欲與我們分享你的故事，歡迎電郵至：[email protected]
