【#香港品牌】畫懷舊電影海報爆紅，90後插畫師發放經典「港味笑彈」
「舊時有幾好……」有否想過這類話當年的說話竟出自90後口中？
「無紙用工作室」創辦人兼插畫師林嘉恒（恒仔），愛電影，尤其是喜劇及英雄片，對昔日手繪電影海報更是情有獨鍾。他欽佩一眾前輩敢於用筆觸呈現很多獨特新穎的元素，創意之大膽很難在這個年代找到。於是他決心用電繪復刻箇中味道，更加入喜劇的元素，令主題貼地的作品，懷舊得來又充滿喜感：「一來因為自己鍾意喜劇，二來希望畀大家一啲歡樂。」
雖是飲周星馳「奶水」長大的90後，但恒仔對70、80年代的港產片如數家珍。「阮大勇老師係其中一位好崇拜嘅前輩，以電影海報《雞同鴨講》為例，佢連『雞同鴨講』呢四粒字都玩埋，將雞同鴨嘅元素加入字款。而家呢？只係電腦整字款就算，真係分別好大！以前海報嘅人像畫唔會得一張劇照咁悶，係會將主角嘅神髓畫晒出嚟，仲加埋表情、動作，令海報更加得意。」今時今日，科技雖然帶來不少便利，但某程度卻限制了創意，所以他決定用電繪重塑懷舊電影海報的感覺。
一夜激增近2千個Likes 「我要多謝神奇女俠！」
這條復刻之路總不容易，當時他嘗試過很多不同的Brush軟件，摸索了一段長時間，才勉強呈現合適的油畫效果。2017年他於facebook創立專頁「無紙用工作室」，分享自己創作的電繪人像畫。同年電影《神奇女俠Wonder woman》上映，他為該電影海報進行二次創作，亦因此而爆紅。「用咗70、80年代懷舊電影海報畫法，人像有咁大畫到咁大，戲名硬譯成中文『溫打烏文』，大大隻字打直畫，其他文字亦排到密麻麻。畫完後我知會好爆，但冇諗過會咁犀利！」這作品令專頁原本只得70個Like，一夜激增至近2千個！「我好多謝呢個作品，佢係我嘅里程碑。」
一圓為舊戲院畫海報之夢
自從他一邊全職做Graphic designer，一邊業餘享受創作結合懷舊及玩味的電影海報，而後者的出品話題夠胋地，愈來愈歡迎，甚至獲不少電影公司、商業品牌等賞識並邀請合作。2019年他辭掉全職工作，專心創業。這些商業合作帶來收入之餘，亦給他很大的滿足感。好像早前為皇都戲院閉門復修前的展覽而創作了一系列懷舊電影海報。「呢個Job令我達成喺舊戲院畫舊海報嘅夢想，做得很開心，觀眾看得投入，好似穿梭時光隧道咁。」
「佩服前輩設計到咁多字款」
創作懷舊電影海報既是工作，也是興趣。身為鏡粉的他，先後「自肥」創作了盧瀚霆「接近神人」、姜濤的「亞洲第一」、柳應廷「進撃的狂人」及江𤒹生「型到爆」，尤以後者的滿足感最大。「裏面加入咗好多唔同元素，包括周星馳《國產凌凌漆》嘅豬肉刀、豬肉枱暗格嘅司令、馬天尼等，仲有『荃灣A』，好有挑戰。」轉眼間，今年是他創業的第三年，生意漸上軌道，而恒仔對創作仍充滿熱血：「字款設計係最難，用嘅時間往往等於畫海報其他內容嘅時間，所以好佩服前輩諗到咁多字款。（點樣改進？）都係果句：平時睇多啲，豐富腦袋呢個圖書館，有需要時就拎到嘢出嚟。」
文：Wendy @lainga.lai
編：肥妹記者 @fatgirl.insight
圖：無紙用工作室 No Paper Studio 無紙用
#StartChing#StartChange#hongkong#Startup#hkstartup#hkstartupers#dreamer#hk#hkstory#NoPaperStudio#香港#香港人#追夢#人物故事#香港製造#香港品牌#無紙用#電影海報#插畫師#電繪
＝＝＝＝＝
StartChing 的團隊是由幾位90後媒體人組成，希望用文字和影片分享本地追夢者的故事，一同成就彼此的夢想。
Follow其他社交平台： linktr.ee/startching
想請我哋飲杯啡？
www.buymeacoffee.com/StartChing
如欲與我們分享你的故事，歡迎電郵至：[email protected]
