【#香港品牌】本港最後手寫小巴牌師傅，自掏腰包保育紅Van文化——HAWK LTD 巧佳小巴用品
「巧佳廣告公司」創辦人麥錦生師傅，可說是「獅子山精神」的寫照。生長於五十年代，當時社會多是貧苦大眾，多數靠雙手維生。成績雖不錯，但家境窮困，讀完小五要輟學打工幫補家計。向來喜歡寫字的他，幸得前輩提點，慢慢練出一手好字。憑這門手藝創業，初時主打廣告招牌，後因店址優勢而成為手寫紅Van牌師傅，幾十年養活他一家。近年甚至自掏腰包保育紅Van文化，飲水思源就是這意思吧！
一早註定的紅Van緣份 練字9年無間斷
麥師傅跟紅Van緣份一早註定。第一份工作就是跟姐夫抹車，第一批抹的正是紅Van。做了約半年，姐夫推薦他去鞋店打工。做了三年，鞋店被收購，又要搵工。由於以前曾有鄰居做廣告招牌，他對此手作深感興趣，約15歲入行做學師。
「公司無人識寫字，老闆叫我找砵蘭街嘅寫字師傅，日日幫襯十幾蚊，有時幾十蚊，我一日得三個幾人工。我本身鍾意寫字，不如學寫字，佢當然唔會教我，但都好好人，叫我買『字聖』黃自元嘅字帖練字。由1973年練到1981年。」期間還於夜校讀了四年英文，達中五程度。
由最年輕變成最後一個
做了五年學師，升為補師，意指功夫未達師傅級。「做咗七、八年仲係補師，當時整個行業都係咁樣壓榨人工。老闆交低工作畀我哋，但師傅唔鍾意理嘢，咩嘢都係我負責，接單係我，收錢又係我，與其咁樣，不如自己開檔。」
1978年於佐敦砲台街成立「巧佳廣告公司」，初時主要制作廣告招牌。當時佐敦道碼頭是重要交通樞紐，砲台街更是上水、大埔、荃灣、元朗、青山道、美孚、觀塘等十幾條紅Van路線的集散地。不少司機找他寫小巴牌，原本是晚上的兼職，後來訂單越來越多，1982年正式入行。「當時我係全行最細，得廿幾歲。十幾年前最後一個師傅退休，就淨得我一個。」
「所有嘢都係小巴畀我！」
在紅Van行業經歷40個寒暑，見證行業最風光的日子。麥師傅坦言，現時光景最差，將來亦不見好轉。「地鐵支線愈來愈多，每開一條支線我哋就有幾百架車失業。」他仍留守店舖，近幾年更肩負保育紅Van文化的使命，全因兩位外國人的啟發。
第一位是曾職香港Big Bus的澳洲工程師，他約滿回澳洲，傾盡家財在當地重建一個跟香港一模一樣的公共車站。另一位是香港大學外籍教授包睿舜，40年前來港，他一句廣東話也不識，2017年卻推出粵語詞典。「外國人都保育你們嘅文化，為何我哋唔做呢？實在講唔過去！紅Van幾十年養大我啲仔女，我所有嘢都係佢畀我，而家只係畀返少少畀，都係應該嘅。」
獲日本書法家專程到港支持
他不放過任何一個傳承紅Van文化的機會，除一些特殊原因外，任何訪問來者不拒。推出小巴精品、舉辦手寫小巴牌工作坊等，去年更成立小巴文化資料館。「啲人對小巴有興趣，我係開心嘅。最難忘疫情前，有個日本人特登飛嚟香港參加工作坊，第二日飛返日本，原來佢係日式書法家，我很感動。」
不排除未來結業離港 小巴文化館搬網上經營
現時麥師傅已65歲，他不諱言，將來若力有不逮，便會離港與早已移居外國的家人團聚，結束實體店舖，小巴文化資料館則搬到網上經營，以另一種形式繼續保育紅Van文化。
文：Wendy @lainga.lai
編：肥妹記者 @fatgirl.insight
圖： StartChing – Wendy @lainga.lai / HAWK LTD 巧佳小巴用品
#StartChing#StartChange#hongkong#Startup#hkstartup#hkstartupers#dreamer#hk#hkstory#香港#香港人#追夢#人物故事#香港製造#香港品牌#巧佳小巴用品#小巴#紅Van#巧佳廣告公司
＝＝＝＝＝
StartChing 的團隊是由幾位90後媒體人組成，希望用文字和影片分享本地追夢者的故事，一同成就彼此的夢想。
Follow其他社交平台： linktr.ee/startching
如欲與我們分享你的故事，歡迎電郵至：[email protected]
